Presidenti i Shteteve të Bashkuara të Amerikës Barack Obama, i shoqëruar nga Sekretari i Shtetit John Kerry kanë mbërritur në Paris, ku kanë bërë edhe homazhe për viktimat e masakrës së 13 nëntor. Obama mori pjesë në samitin botëror të klimës, ku u diktuan problemet e ndotjes globale dhe fakti se si kjo po ndikon në ngrohjen globale. Presidenti amerikan tha se vendi i tij, si një prej shteteve më të fuqishme ekonomike, ka një përgjegjësi të madhe për sa i përket ndotjes së shkaktuar. Ai tha se çdo shtet duhet të marrë përgjegjësinë e tij dhe të bëhet diçka për të reduktuar nivelin e ndotjes. “Ne mund ta ndryshojmë të ardhmen tani”, u shpreh Obama. Gjithashtu ai është takuar edhe me presidentin kinez Xi Jinping. Të dy udhëheqësit ranë dakord se do të luftojnë për uljen e ndotjes. Kina është një prej emetuesve kryesorë të karbonit në botë, duke sjellë pasoja për mjedisin. (gazeta-Shqip.com)
