Reshjet e fundjavës kanë rikthyer përmbytjet dhe probleme me qarkullimin rrugor në vend. Me dhjetra shtëpi, lokale dhe biznese në qytetin e Fierit janë përmbytur si pasojë e vërshimit të lumit Gjanica.
Përmbytjet janë regjistruar në zonën pas godinës së Prefekturës së Fierit, gjithashtu në lagjet, “1 Maji” dhe “Konferenca e Pezës”.
Burime nga vendi i ngjarjes raportojnë se ka pasur dëme të konsiderueshme në këto zona, të cilat përmbyten gjithmonë kur ka reshje të mëdha. Si pasojë e futjes së ujit në banesa janë djegur pajisjet elektroshtëpiake. /Telegrafi/
